प्रश्न मित्रताको

साथी;
सुन्दै मन प्रफुल्लित हुने यो शब्द , कठिन अवस्थाको आश्रय यो शब्द, जीवनमा एक्लोपनको आभास हटाइदिने यो शब्द, गन्तव्यको सहयात्री यो शब्द, विश्वासको पात्र यो शब्द, स्मृतिको भेल यो शब्द । खै ? कुन शब्दले यो साथी शब्दको बयान गरु? यो शब्द यति विशेष छ कि यो शब्दको जति बयान गरे पनि म थकित हुने छैन ।
सोच्नुस् त शब्दले नै यति श्रेष्ठता बोध गर्दछ भने यो शब्दको पछाडि जो व्यक्ति छ उसको तपाईंको जीवनमा कति महत्त्व होला । तर मलाई कहिले काँही डर लाग्छ यो शब्दबाट । यो पनि बत्ती मुनिको अँध्यारो जस्तै हो कि । प्रश्न उठ्छ "असलमा मेरो साथी को हो ?" सोच्ने गर्छु साथी भनिएका जो जति व्यक्तिहरू छन् के साँच्चै तिनीहरू मेरा साथी हुन् र? कतै मैले आफ्नै खुट्टामा बन्चरो हनिराको त छैन? सोच्छु, आफैलाई प्रश्न गर्छु "एउटा अपरिचित व्यक्ति केही क्षणको वाक्य आदन प्रदान गर्दैमा मित्र हुन्छन्?" यदि यसो हो भने म जीवनमा साथीको कल्पना समेत गर्दिनँ ।
कति सोजो छौँ है हामी । साथी शब्द मै साथ छ तर पनि यात्राको क्रममा दुई वाक्य साट्दैमा उसलाई हामी साथी भन्छौँ । के साथ दुई वाक्यको हो र ? सधैँ आफ्नो लागि मात्र सोच्ने हामी आफूभन्दा सम्पन्न व्यक्ति देख्दा साथी बनाउन पाए हुन्थ्यो भन्ने सोच्छौँ । के साथ फाइदा हेरेर दिइन्छ? अझै गल्ती गर्दै छौँ हामी । कक्षाकोठामा सँगै बसेर पढ्ने हरेकलाई हामी साथी भन्छौँ । सोच्नुस् के साच्चै एउटै कोठामा बसेर पढ्दैमा साथी हुन्छौँ? इन्टरनेट र सामाजिक सञ्जालमा भेटेको व्यक्ति साथी, आफ्नो साथीको साथी पनि साथी, काम गर्ने कार्यालय वा स्थानमा उपस्थित सबै साथी, आफ्नो प्रशंसा गर्ने व्यक्ति साथी, आफ्नो गल्तीमा औँला नदेखाउने व्यक्ति साथी, यसरी त तपाईंको कति साथी छन् जिन्दगीमा । साथी भनिएकै कतिले छोडे र फेरि कति आए ।
अब तपाईंहरू सोच्दै हुनुहुन्छ होला "यसरी त मेरा सबै साथीहरु साथी नै होइनन् । के मेरो जीवनमा साथी छैनन् र?" तर त्यो सोच पनि गलत हो । मैले पनि मेरो जीवनमा तपाईंहरू जस्तै धेरैलाई साथीको पद दिए तर थोरैलाई त्यस पदको सम्मान । त्यसैले तपाईंको साथी ऊ हो जसलाई तपाईं साथी पनि भन्नु हुन्छ र त्यस पदको सम्मान पनि दिनुहुन्छ । आफै विचार गर्नुहोस् एउटै कक्षामा पढ्ने सबैलाई साथी भन्नु हुन्छ तर सबैलाई समान सम्मान दिनु हुन्न । कुनै एक (वा बढी) व्यक्तिलाई आफ्नो नजिकको मित्र बनाउनु हुन्छ । त्यसैले अब साथीको पद कसैलाई दिनु हुन्छ भने उसलाई सम्मान पनि दिनुहोस् ।
असल मित्र को हो? मित्रता कस्तो हुनु पर्दछ? के धेरै पछि भेटेको साथी पनि साथी हो? यस्ता सबै प्रश्नको उत्तर हजुरहरुले विभिन्न मान्छेबाट विभिन्न उत्तर पाउनुहुनेछ । तर आज म आफ्नो विचारमा मित्रता के हो, कस्तो हो भन्न गैरहेको छु । सायद हजुर र मेरो विचार नमिल्न सक्छन् तर एकपटक ख्याला गर्दिनुहोला ।
मेरो पछाडि अरूले कुरा काट्दा त्यसको विरोध गर्नु नै मित्रता होला । मेरो गल्तीलाई औँलाउनु र सही बाटोमा हिँड्न सिकाउनु नै मित्रता होला । म निस्तब्ध हुँदा मेरो मुहारमा अंकित भावनालाई बुझ्नु नै मित्रता होला । मेरो आफ्नै परिवार पछि मेरो सबैभन्दा बढी चिन्ता हुनु, हरेक ईच्छा, चाहनाको कदर गर्नु नै मित्रता होला । विद्यालयमा शिक्षकले हाम्रो स्थान परिवर्तन गर्दा फेरि शिक्षकलाई सँगै बस्न अनुरोध गर्नु नै मित्रता होला । जीवनको रमाइलो क्षणहरु सँगै सिर्जना गर्नु मित्रता होला । आफ्नो अन्तस्करण बाट सिर्जित भएका भावना कसलाई निर्धक्क खोल्न सक्नु मित्रता होला । सबै जना मेरो विरुद्धमा हुँदा मलाई बुझेर मसँगै उभिनु मित्रता होला । मेरो हारमा अरू हाँस्दा सहयोगको हात बढाउनु मित्रता होला । आफूले भनेको हरेक मनपर्ने र मन नपर्ने कुरा, स्वभाव, आचरण आदिको ख्याल गर्नु मित्रता होला । धेरैपछि भेटेपछि पनि सम्बन्धमा तनाव नआउनु मित्रता होला ।
समयको प्रतिबन्ध नभई आफूले कुनै पनि बखत सहयोग माग्दा सधैँ सहयोगको लागि तयार हुनु मित्रता होला ।
यसरी मित्रता बारे कति प्रश्नहरु छन् र हरेक व्यक्ति अनुसार आ-आफ्नो उत्तर । कति प्रश्नका उत्तर भने ओझेल मै छन् । तर मेरो विचारमा मित्रतामा कुनै प्रश्न हुँदैन । हुन्छ त केवल विश्वास, भरोसा, आत्मीयता, सहिष्णुता, भातृत्व र भग्नित्वको भाव, प्रतिबद्धता, एकता र सदभाव । मित्रता भनेको नभनिएको प्रतिबद्धता हो, रगतको सम्बन्ध नभएनी आत्माको सम्बन्ध हो र लँगडोको लागि बैसाखीको जस्तो सम्बन्ध हो । जब हामी कुनै मित्रतामा बाँधिन पुग्छौँ तब हाम्रो शब्दकोषबाट एक्लोपन हराएर फूलको माला थपिन्छ । मित्रता त्यति सजिलो छैन न त्यति कठिन । तर याद राख्नुहोस्, जब तपाईंले विश्वास गरेर मित्र भन्नुभएको व्यक्तिले साथ छोडेर जान्छ नी, त्यसपछि तपाईंलाई मित्रता शब्दबाट पनि डर लाग्ने छ । त्यसैले तपाईंले कसलाई साथी बनाउनु हुन्छ, तपाईंको हातमा छ । प्रकाश दिने दीप लाई पनि अन्धकार छँदै निभाउने आजको संसारमा असल मित्र पाउन धेरै गाह्रो छ । यदि पाउनु भएको छ भने त्यो मित्रताको दीप लाई कहिलै अन्धकारको सहयात्री हुन नदिनु ।

CLICK HERE TO FOLLOW